Joan den asteazkenean Tau Baskonia eta Moskuko CSKAk aurrez aurre jokatu zuten partiduan ohorea besterik ez zegoen jokoan, CSKA eta Tau 1. eta 2.postuan finkaturik baitzeuden hurrenez hurren Euroligako Top 16ko beraien taldean, biek hurrengo faserako txartela eskuratuta zutelarik.
Baina bi talde hauek aurkakotasun handia izanik Euroligako aurreko edizioetan eta jakinik, Tauk Buesa Arena pabilioian Euroligan 15 hilabete daramatzala porrota zer den ezagutu gabe, oso ikuskizun duina erakutsi zieten bertara hurbildu zen zale andanari.

Partidua 70-63ko markagailuarekin bukatu zen, Tauren alde. Hala ere, han dena ez ziren albiste onak izan, Tauk jakin baitzuen hurrengo faserako aurkaria nor izango duen, Panathinaikos ahalguztiduna alegia, kosta ala kosta saihestu nahi zutena.

Partiduaren azterketari dagokionez, Perasovic-ek (gasteiztarren entrenatzaileak) normalean gutxi jokatzen dutenei minutuez gozatzeko aukera eman zien, eta erantzun bikaina eman zuen Sergi Vidal hegaleko kataluniarrak, 16 puntu sartu baitzituen, partiduko izarra ezbairik gabe.

1go zatiari baldar ekin zion Tauk, bere aurkariaren izen handiak beldurturik eta sistema aldaketen ondorioz, Prigioni antolatzaile argentinar bikaina ez baitzen hasierako bostekoan atera, bere ordez, Roko Leni Ukic kroaziarra atera baitzen, partidu benetan penagarria burutu zuena.

2. zatian, ordea, hasierako presioaren zama kenduta, Prigioniren kantxaratzeak lagunduta eta Vidal eta Erdoganek 6,25 marratik izan zuten aportazioari esker, Tauk buelta eman zion markagailuari, 30 eta 26ko aldeko markagailua finkatuz.

Hala ere, 2. zati hau bukatzeko 2 minutu faltan, Moskuko taldean Papaloukas antolatzaile greziarra kantaxaratu zen eta bere taldea bizi-berritu eta atsedenaldian 32 eta 34ko markagailua utzi zuen. 3. zatian ere markagailuak estu jarraitu zuen eta azpimarragarria da Drobnjak serbiarrak eginiko lan gogorra. 4. eta azken zatian, berriz, Tauk estu hartu zituen aurkariak defentsan eta gainera bi pibotak, Scola eta Splitter, fin aritu ziren uztai azpian.

Horrela, Tauk ohoreari eutsi eta 70 eta 63 irabazi zion Europa osoan aurrekontu gehien duen taldeari.
Zaleak gainera irribartsu atera ziren behingoz. Aipatu,azkenik, Vidalen partidua izan zela atzokoa eta Prigionik Splitterrekin egindako “alley-up”ak pabilioia zutik jarri zuela.

Berrian partidu honi buruz Jon Rejado gasteiztarrak idatziriko artikulua ikusi nahi baduzue, klikatu hemen.

Entzunda eta ikusita izango duzuen bezala, Frantziako ikasleak eta zenbait sindikatu mobilizazio ugari ari dira egiten Dominique de Villepinek, Frantziako lehen ministroak, martxan jarri nahi duen lehen kontratuaren aurka. Lehen kontratu hau 26 urte baino gutxiago dutenei zuzendua dago eta, funtsean ondorengoa dakar: 2 urteko iraupena duen kontratu batean, inolako kalte ordainik gabe kaleratzeko eskubidea ematen dio enpresa buruari.

Gauzak honela daudela, 3 milioi pertsonatik gora mobilizatu dira kontratu honen abolizioa eskatuz. Baina Villepinek esan duenez, kontratua ez da kenduko nahiz eta zenbait gauza eztabaidatzeko alde agertu den. Sindikatu gehienek eta ikasleek mahai inguru batean biltzeari uko egin diote eta lehen kontratua bertan behera uzteko eskatu diote Frantziako lehen ministroari.

Egoera honen aurrean, jendeak bere iritzi propioak plazaratu ditu eta batzuek diotenez, Le Pen eta faxismoaren aurka 2002ko maiatzean egin ziren protestekin konparatu dute. Beste batzuek, berriz, 1968ko maiatzaren 2an Parisen hasitako mobilizazioekin.

Baina egoera horrela dagoela, ikasleoi batez ere eragingo dizkien kalteak zein izan daitezkeen ikusita, erreflexio bat merezi duela pentsatzen dut. Horregatik zuen iritzia eskatzen dizuet denon artean eztabaidatu ahal izateko.

Hau dena esan ondoren, artikulu oso interesgarri bat aurkitu dudala esan nahi nizueke, bertan munduko ikasleen borrokaz mintzatzen da historian zehar pasa diren gertakariak azalduz.

Gaur, DBHO 1 eta 2ko euskarako ordu guztietan tartetxo bat esamoldeak asmatzeari eman behar diogu, baina ez nolanahiko esamoldeak, ez, ligatzeko esamoldeak ideiatu behar ditugu! Kontua da, Ordiziako Gazteentzako II. Ligatzeko Esamoldeen Lehiaketa martxan dela eta denok gurea aurkeztu behar dugula. Ea, bada, jar ezazue zuen irudimen hori dantzan!!!

Ondoren topatuko duzue aipatutako lehiaketan parte hartzeko jakin beharreko guztia:

Ordiziako Euskararen Udal Aholku Batzordeak antolatu du Ordiziako Gazteentzako II: Ligatzeko Esamoldeen Lehiaketa. Lehiaketaren helburua, lagunarteko egoera informaletan euskarazko esamoldeak sustatzea da.

1. NORENTZAT

Lehiaketa honetan 14 urtetik gorako edozein ordiziarrek har dezake parte. Lanak epaitzeko orduan hiru maila bereiziko dira:

A maila: 14-15 urte (DBH 3)
B maila: 15-16 urte (DBH 4)
C maila: 16tik gora

Pertsona bakoitzak ezin izango du esamolde bat baino gehiago bidali.

2. GAIA

Lehiaketaren gaia EUSKARAZKO PIROPOA da; hots, ligatzeko esamolde edo piropoak.

3. LANEN EZAUGARRIAK

. Esamolde guztiak jatorrizkoak, norberak sortuak eta euskaraz idatziak izan beharko dute.
. Lanek, maila edozein delarik ere, esaldi bat izango dute gutxienez, eta bi gehienez.
. Bereziki begiratuko zaio testuaren originaltasun, zuzentasun, jatortasun eta egokitasunari.
. Lanak, DIN A-4 orrian, ordenagailuz idatzita aurkeztuko dira. Posta elektronikoz ere bidali ahal izango dira.

4. LANAK NOLA AURKEZTU

. Lanean ez da egilearen daturik jarriko, esamoldea bakarrik baizik.
. Egilearen datuak (izen-abizenak, adina, telefonoa, helbidea eta lanaren lema) kartazal itxi batean sartuko dira, eta kartazal horren azalean jarriko da lema.
. Posta elektronikoz bidalitako esamoldeen kasuan, esamoldea fitxategi batean bidaliko da, “esamoldea” izenarekin, eta egilearen datuak (izen -abizenak, adina, telefonoa, helbidea eta lanaren lema), “egilea” izena duen beste fitxategi batean”.

5. LANAK NORA BIDALI

Lanak eta egilearen datuak dituen kartazala, handiagoa izango den beste batean sartuta, honako helbidera bidali beharko dira:

Ordiziako Gazteentzako II. Ligatzeko Esamoldeen Lehiaketa
Ordiziako Udala- Euskara zerbitzua
Kale Nagusia 24
20240 ORDIZIA

e-posta: euskara@ordizia.org

6. LANAK AURKEZTEKO EPEA

Lanak aurkezteko epea martxoaren 20an hasi eta apirilaren 3a arte luzatuko da.

7. HAUTAPENA

. Jasotako piropo guztien artean, hautapen batzordeak sei aukeratuko ditu, maila bakoitzeko bi.
. Jasotako piropo guztiak Ordiziako Udalaren web gunean jarriko dira erakusgai.
. Esamolde guztiak Euskararen Aholku Batzordearen esku geratuko dira.

8. SARIAK

Maila guztietan:

1go saria: 30 €
2. saria: 20 €

Epaimahaikoak hala erabakiz gero, sariren bat eman gabe gera liteke.

Kamisetak: Diru-sariaz gain, maila bakoitzeko lanik onenen Ordiziako egileek 10na kamiseta jasoko dituzte, lagunen artean banatzeko. Horietan, saritua izan den piropoa joango da diseinatua. Gainontzeko piropo hautatuen egileek ere kamiseta bana jasoko dute. Lanak aurkeztu dituzten guztien artean, gainera, 17 kamiseta banatuko dira.

9. EPAIMAHAIA

Lehiaketaren epaimahaia Ordiziako Euskararen Udal Aholku Batzordeko bi lagunek, DBH2ko ikasleei Lagunarteko Hizkerarekin Jolasean saioak eman dizkien Lasarte-Oriako Ttakun euskara elkarteko teknikariak, eta bi ikastetxeetako irakasle banak osatuko dute.

10. SARI EMATEA

Sari ematea apirilaren 25ean izango da, Barrena Kultur Etxean, 19:00etan. Bertan izango dira epaimahaia osatu duten kide guztiak.

Den-dena garbi dago, ezta??? Ea, bada, zer bururatzen zaigun!!!

Spencer Tunick argazkilari estatubatuarra oso famatua egin da azken urte hauetan milaka pertsona, gizonezko zein emakume, biluzik erretratatu dituelako.

Tunick 1994an hasi zen lan hau burutzen, horretarako New York hartu zuen bere lana burutzeko gune gisa. 30 pertsona inguru elkartu zituen ONU egoitzaren aurrean, honek izugarrizko eskandalua sortuz herritarren aurrean.

Hamalau urte hauetan, munduko hainbat lekutatik pasatu da: San Paulo, Santiago de Chile, London, Montreal eta Erromatik, besteak beste. Sarritan kartzelaratua izanda argazki eztabaidatu hauen ondorio.

Spencer Tunickek 1500-2000 pertsona inguru elkartzen ditu bere argazki saioetan. 2003ko ekainean marka hau hautsi zuen Bartzelonan 7000 pertsona inguru elkartu zituenean, argazkia ateratzeko marko gisa D’art de Catalunya museo nazionala (MNAC), Maria Kristina etorbidea eta, azkenik, dorre Veneziarra erabiliz.

Orain, Donostiari dagokio. Eguna 2006ko apirilaren 22a izango da eta lekua ziurtaturik ez badago ere, adituen iritziz, “La Concha� hondartza, Kursaala edo “Sagrado Corazon� izan daiteke. 2000-2500 pertsona inguru elkartzea du helburu, adin guztietako pertsonek parte har dezakete eta partaide bakoitzari, oroigarri gisa, argazki bar emango zaio. Argi dagoen gauza bakarra Donostia hiria munduan zehar ezagutzera emateko bidea izateaz gain, ikusmin handiko jende ugari hurbilduko dela bertara.

Parte hartzeko web orrialdean sartu eta bertan izena eman behar da. Ahaztu baino lehen, garrantzitsua da esatea ez dela inolako diru saririk emango. Animatzen zarete???

SIGLAK

1. Letra larriz, letrakera arruntez eta punturik gabe idazten dira siglak; baita izen osoa letra etzanez idatzi beharreko izenen siglak ere.

EAE, HPS, HABE, AEK, EHU, EUTG, MCC, ELA, LAB, UGT, BBK, BBVA, BEZ, CD, DVD…
Orduan hasi zen EGLU argitaratzen: alegia, Euskal Gramatika: Lehen Urratsak.

Bada, ordea, salbuespenik:

1. Erabiliaren erabiliz izen arrunt bihurtu direlako letra xehez idazten direnak: adibidez, radar (radio detecting and ranging).
2. Letra xehez ere idatzi ohi den zenbait sigla eta akronimo: UNESCO/Unesco, RENFE/Renfe, SEAT/Seat, ICONA/Icona…
3. Testu osoa letra larriz dagoenean (tituluetan eta), puntu eta
guzti idatz daitezke siglak: U.E.U./UEU LAGUNTZA
ESKE, A.E.B./AEB KINKA LARRIAN…

2. Siglak laburbiltzen duen izena osorik adierazten da testu bakoitzeko lehen agerraldian, irakurlearentzat oso sigla ezaguna denean izan ezik.

EAE (Euskal Autonomia Erkidegoa) aipatu ondoren, EUTG (Estudios Universitarios y Técnicos de Gipuzkoa) eta MCC (Mondragón Corporación Cooperativa) goraipatu zituen atzerritarrak.
Europar Batasuna (EB) eta Ameriketako Estatu Batuak (AEB) elkar zaintzen ari dira.
OEH (Orotariko Euskal Hiztegia) lagungarri ona da EGAtik gorako agiria eskuratzeko.
Aldizkarien sailean, begiratu RIEV (Revista Internacional de Estudios Vascos) eta BRSVAP (Boletín de la Real Sociedad Vascongada de los Amigos del País).

3. Deklinatzerakoan (eta ahoskatzerakoan), kontuan izan sigla batzuk letraka irakurtzen direla, eta beste batzuk, silabaka.

EHU (e-hatxe-u): Euskal Herriko Unibertsitatea EGA (e-ga): Euskararen Gaitasun Agiria
Oharra:
Bada zati bat letraka eta bestea silabaka irakurtzen den siglarik ere: PSOE (pe-so-e).

4. Sigla eta deklinabide-atzizkia marratxorik gabe batzen dira, salbu eta siglaren azken letra berberaz hasten denean atzizkia ere.

UEUn, hizlarietako batzuk ETBko kazetariak dira; beste batzuk, berriz, EHUtik joandako irakasleak.
BBK-k adierazi du AEK-ko ikasleek gogotik eskertu dutela BBKren dirulaguntza.

Oharrak:

1. Siglaren azken letra R gogorra denean, ez da “r� errepikatu behar lotura egiteko. Beti ere, atzizkiaren berezko “r�ari eutsi egin behar zaio.

ELKARen lana goraipatu du RPRko diputatu ohiak.
RPR-ren izenean dator.

2. Testu osoa letra larriz dagoenean, hona aukerak: U.Z.E.I.REN GUNE BERRIA / UZEI-REN GUNE BERRIA

5. Deklinatzerakoan, izen berezitzat hartzen da sigla, eta leku izen bereziak bezala deklinatzen, izen arrunt gisako siglak izan ezik.

EUDELeko arduradunak AEBra joan dira, Renoko agintariei-eta hemengo udalen berri ematera.
EUTGko irakasle asko Deustuko Unibertsitateko ikasle ohiak dira.

Oharra:

Sigla batek izen bereko hainbat subjektu baldin baditu, orduan sigla hori pluralean deklinatuko da hala dagokionean. Horixe da, esate baterako, EKT (Euskal Kultura Taldea) siglaren kasua, honako adibide honetan ikus daitekeenez:
Ahozkotasuna ikertzen ari dira Durangoko EKTn eta Gipuzkoako EKTetan.

6. Izen arrunt gisako siglak, ordea, hitz arruntak bezalaxe deklinatuko dira.

Sail horretakoak dira NA (Nortasun Agiri), BEZ (Balio Erantsiaren Zerga), CD (Compact Disc), PC (Personal Computer), GKE (Gobernuz Kanpoko Erakunde) eta abar, eta baita hiztegi berezietako DM (datu mota), DMA (Datu Mota Abstraktu) eta beste asko ere.

Non grabatu duzu CDa?
Nork itzali ditu PCak?
Zenbat ordaindu duzu BEZa?
Esan berriro zure NA-aren zenbakia.
Bihar hastekoa da GKE-en biltzarra.
Dakizunez, datu mota (DM) guztiak ez dira datu mota abstraktuak (DMA); beraz, ongi bereizi behar dira DMak. Esaterako, DM hori DMA bat da, oso ugariak baitira DMak eta DMA-ak.

Hona hemen euskarazko zenbait sigla erabilgarri:

AE Autonomia Estatutua
AEB Ameriketako Estatu Batuak
AEK Alfabetatze Euskalduntze Koordinakundea
AHT Abiadura Handiko Trena
BEZ Balio ERantsiaren gaineko Zerga
BPGb Barne-Produktu Garbia
BPGd Barne-Produktu Gordina
DBH Derrigorrezko Bigarren Hezkuntza
DBHO Derrigorrezko Bigarren Hezkuntza Ondorengoa
EAE Euskadiko Autonomia Erkidegoa
EEE Europako Ekonomia Elkartea
EH Euskal Herria
EHAA Euskal Herriko Agintaritzaren Aldizkaria
EHBO Euskal Herriko Buletin Ofiziala
EHE Euskal Herrian Euskaraz
EHU Euskal Herriko Unibertsitatea (EAEkoa)
EI Eusko Ikaskuntza
EIE Euskal Idazleen Elkartea
EITB Euskal Irrati Telebista
EJ Eusko Jaurlaritza
EKB Euskal Kulturaren Batzarra
ELB Eusko Legebiltzarra
ET Eusko Trenbideak
ETA Euskadi Ta Askatasuna
FFAA Foru aldundiak
HAEE Herri Ardularitzaren Euskal Erakundea
HIES Hartutako Inmuno-Eskasiaren Sindromea (SIDA)
HPIN Hizkuntz Politikarako Idazkaritza Nagusia
IFZ Identifikazio Fiskalaren Zenbakia (NIF)
IFK Identifikazio Fiskalaren Kodea
IK Iparretarrak
IRALE Irakaslegoaren Alfabetatze-Euskalduntzea
KEM Kontzientzi Eragozpen Mugimendua
KPI Kontsumorako Prezioen Indizea
LH Lanbide Heziketa
LK Langile Komisioak
LPEZ Lan Pertsonalaren Errendimenduaren Zerga
NAN Nortasun Agiri Nazionala
NATO Ipar Atlantikoko Tratatuaren Erakundea (OTAN)
NBE Nazio Batuen Erakundea (ONU)
NUIZ Norbanakoen Urteko Irabazien gaineko Zerga
OHE Objektu Hegalari Ezezaguna (OVNI)
PFEZ Pertsona Fisikoen Errentaren gaineko Zerga
PVP Publikoarentzako Salneurria (PSN)
SA Sozietate Anonimoa (SA)
SK Sozietate Kooperatibo
SM Sozietate Mugatu (SL)
TAO Trafiko eta Aparkamenduaren Ordenamendua (OTA)
TB Telebista
UEU Euskal Herriko Unibertsitatea
UZEI Unibertsitate Zerbitzuetarako Euskal Ikastetxea

Jatorria:

• ORTOTIPOGRAFIA (PDF) : letrakera arrunta, etzana, lodia, kakotxak, siglak, laburdurak… (Estilo-liburuaren lehen atala)

• Euskal Gramatika Osoa. I.Zubiri-E. Zubiri. 84-85. orriak